A presente investigación iníciase cunha introdución na que se fai referencia ás razóns que levaron aos cambios pertinentes e necesarios na elaboración das probas de galego, pasando dos anteriormente coñecidos como nivel inicial e de perfeccionamento aos cinco niveis CELGA (Certificados de Lingua Galega), adaptados aos cinco niveis do MECRL (A2, B1, B2, C1, C2), resultado da reunión anual mantida en Cardiff o 9 de novembro do 2005 polos membros de ALTE (Association of Language Testers of Europe). Nas sucesivas seccións, preséntanse os estudos pormenorizados de cada un dos niveis dos CELGA seguindo a mesma estrutura: Descrición xeral do nivel en cuestión, descrición do nivel segundo as distintas habilidades (comprensión oral e escrita, expresión oral e escrita), referencia aos contidos, apartado que está dividido en tres áreas: lingua e comunicación, onde se especifican as funcións comunicativas segundo o nivel; lingua e sistema, onde se explican os saberes relacionados co código lingüístico, gramaticais, fonéticos, ortográficos e léxicos, e, xa para rematar, os contidos socioculturais relacionados coa lingua, a cultura e a sociedade.