“1895. Almanaque Gallego” apareceu na Coruña dirixido por F. Lage e G. Díaz e impreso pola tipografía de La Unión Gallega. Esta edición facsimilar quere ser unha homenaxe á lingua galega na que están escritas, na súa integridade, as 136 páxinas deste ameno e divertido almanaque literario no que alternan prosa e verso, poemas e contos; todo ou case todo de inspiración popular. Galo Salinas, Salvador Golpe ou Florencio Vaamonde todos colaboran aquí. Trátase dun fermoso almanaque literario que, ademais, leva o seu calendario e unha importante parte de publicidade comercial así mesmo en lingua galega.